Tanglai ipupa ten nopni a hizongin dahni a hizongin biakding pasian nazong kawikawi uh hi. a zonzon uh hangin biakpiak ding kician na mulo uh aa, a kitak huai a luahuai na te leh a lamdang na te nabia masa uhhi. banghangin hihbangin nabia uh hiam? cihciangin agentheih adamloh hun uhciangin a belhding uh Siavua leh alungkham sinkham hun ciangun akoh dinguh pasian kisam a hih man in, a kitaak uh Dawi leh kau te a nabia uh a hihi.
Tua Dawi leh kau a theihma un Singkung lian lamdang a sak te a hih kei leh suangtum lian pipi te nabia uh hi. Hih Dawi leh kau te a biak na hang uh pen Dawi leh kau ten ihkha naman leh hong cinasakthei hi cih upna nei (ngaihsun uh a hih man un) a cinat loh nadingin dawi leh kau te, a mai et( lungkim sak) na un nabia uh a hihi. Tua Dawi leh kau te zong aomna uh kibangsak lo uh aa, tual dawi, behdawi,khuasung dawi, mualdawi, gundawi etc cihbangin a tuamtuam na nei uh hi.
Hih Dawi leh kau te tawh kiho nadingin ahizongin mai et nuam hunciangin kizop nading kisam a hihman in palai nanei uh aa, tua palai te pen “Siampu” a hih kei leh “phuisam pu”( Tulai hun hileh Pastor cihna hiding hi) cihbangin min navawh uh hi.Hihsiam pu te in adamlo te damna dingin a biak uh dawi leh kau te tung ah thungetsak in dawi leh kau te lungkim nadingin nektheih dawntheih tuamtuam puak uhhi. hihbangin puak le uh dawite lungkim in hongkhah ding hi ci-in upna nei uh a hih man in Dawi a nbia uh a hihi.
Tuaban ah Dawi tuamtuam a omsak mahbangun tuadawi te tawh kizop nadingin Khuakhua leh a behbeh ki zong “Tulpi” tuamtuam nanei lai uh hi. Tua Tulpi telak ah, Khua Tulpi leh Beh Tulpi cihbangin na neituam/khen lai uh hi.
Khuasung tulpi:::: Tanglai ipupa ten Khuakhat peuh asat ding uhciangin Tulpi nakenghamtang uh hi. Hih tulpi in khua mun hoih leh hoih lo theihna dingin Aisan na neimasa hamtang hi. khua a sat khit uhciangin zong tua khua Tulpi mah in kumsim in khuasung khantoh nadingin Aisan na neiden hi. Hih a Aisan na te lakah a thupi penpen te in Sialsawm Aisan ne leh Khuado Aisan na a hihi.
Hih Khua Tulpi in asep pipen in tangpi tang te te leh dawi leh kau te kikal ah palai hi-in, Khuasungbup tawh kisai Cidam nading leh khuasung khantoh nading tawh kisai-in dawi leh kau tetung thumna/ thunget na/ tokai na anei palai pikhat a hihi. Khua Tulpi pa nasep pen Beh tulpi a hizong Siampu dang te in semthei lo uhhi.
Beh Tulpi::::Tanglai in ipupa ten beh lehphung mah ci-in nathupi sak mahmah uh aa, tuamah bangin Behkim ciat in Tulpi nanei uh hi. Hih beh tupi-in behsung te ah thupha piak na leh cidam nading nget na kinei hi. hibangin anget uh ciangin “Pusa thoih” na ci uhhi.
Pusa thoih cih kammal pen pu leh pa te agen nopna uhhi. Hih a sisa Pu leh pa te a tu ata te uh thupha piathei hi cih upna nei uh a hihman un beh tulpi in pusathoih nasem hi.
Hih Pusa thoih biakpiak na a neih uh ciangin Innsung tawng ah, Pauban na neilo voktal khat tawh biakpiak na nei uh hi.Pusa thoih cih pen Inntek te nupa in a niding ciangtan uh aa, unau beh leh phung lobuang kuamah kithei sak ngam lo uh hi. Inntek te in adeih ni uh leh hun hongtun ciangin Tulpi pa sam uh aa, thakhat thu in Pusa biakpiak na nei uh hi.
Hih Pusa biakpiak na ah Voksong dingin sesing kizang hi hih voksong Vokmung ladingin mimawkmawk kisawl theilo in tanu te mawhpuak (tavua) ahihi. Vokmung dingin guava abakbulo (lungheng lo a cidam) kila hi.
Tuabangin Pusa thoih khatvei na-ah Guava tang sagih kila in, anih vei na-ah, guava tangkua kila hi. nihvei sangin pusathoih na apiak uh leh guava tangnih hal ta in kikhan toto hi.
Tuaciangin Pusa thoih na dingin Voksong leh Vokmung pen inntual laizangah kiphutkhawm aa, atungah akgia leh sawmka khauvom in lomhen uh hi.Hihbang te a sepkhit uhciangin Pusathoih nading a Voktal uh man uh aa, akhe teng henton uhhi. singzawlmam khat tawh voktal zaw uh aa, innkaa taangdawn ah Voktal a sawpsiang khit uhciangin, Siallusut ah Tuppi pa ap uhhi.Tua khit ciangin Inntek pa in Zo zu belkhat tulpi pa hong ap khitciangin, Tulpi papi zong Pusa biakpiak ding hongkpan hi. Tulpi pa in a masa pen in voktal tulzu phih masa phot in voktal atee pan dawtsut in go uhhi.
Hihbangin a vokdawtna tul tung aa, sibang teng inntek te innkuan khat khit khat atal voksi nuh in, inntek te bangkuasung a cidam nading a hizongin gal leh sa amat nading asisa inntek pu lehpa tekiangah tulpi pa in ngetsa hi. hihbangin a nget ciangin phuisam kici-in tulpi pa in inntek bangkua sungah a sisa te min khatkhit khat lo kawmin, “natu nata te mim cipha tang cipha guan in sialno dawng guan in vokna dawng guan in, gualkhup in siam in phai khup in siam in, tanu tapa kongnget na hi, kavopi ta kavoktal ta ka meitual ta hongsangin gualkhup phaikhup in siam in ci-in phuisam hi”
Hihbang teng a phuisam khit ciangin tanu te in ngeina bangin avoksa sem in huan hu aa, aminciangin Vokmung guatang zah asasem in ciangsung ah koih in biakpiak na tautungah koih uhhi. tuaban ah Voklu khuak omna sungah sanam kim tawmtek koih in, Voksong tungah innpua lamnga in voklu suang uh aa,vaknak sungah vok naakguh khat siatsuk uhhi. saneng kai pawlkhat zong sangkil nuai ah koih uhhi. tuakhitciangin Dawihawlkhiat na nei uh aa, tulpi pa saliangkhat pia uhhi.azingsang ciangin siansuan ni kici-in sian an leh sian zu lup in nekhawm uhhi.
Sumtawng thoih na
Nidang ciimnuai/geltui hunlai-in Thangho leh Liando akem dawikungpi-in Thangho leh liado kiangah a vaikhak thukhat in kei sumtawng vaailak ah kongmaang ding aa, kasihkhit ciangin kumsimin vokno dawngpen khat tatawh sumtawng nabia dinguh hi ci-in vaikhak hi. tua vaikhak mahbangin tangho leh liando in zong kumsim mah in sumtawng nabia uh hi. hibiakpiak na pen ipupa te nazangsuak uh aa,thangho leh liando haumah bangin hau nading ngetna in nanei uhhi.
Sumtawng thoih biakpiak na khanglui lai-in, neih leh laam hau nading vulh khawi hau nading khawhsa an leh tui hau nading leh cidam nading lam et natawh sumtawng thoih biakpiak a nanei uh a hihi.tua a hih manin kumsim in Vokno dawngkhat ta tawh sumtawng thoih biakpiak na nanei den uhhi.sumtawng thoih biakpiak na a bawl uhciangin hibangin thunget na nei uhhi. vokna dawng sialno dawng akno dawng kongnget na hi. Mim cipha tang cipha kongnget na hi.Sumnu sumpa kongnget na hi. ka vokno dawng hongsangin cidam mulmam na kongnget na uhhi ci-in a voknodawng uh go uhhi.
Tua a hih man in tanglai-in ihbiakpiak dan pen pasian tektek a kibia hilo in ih kihtak khat peuh leh ih hamphat nading a hih kei leh ihdeih khatpeuh hong pia, a vangnei khuasiam kici khat peuh tungah biakpiak na a kinei a hihi. tua te khempeuh a hong pian na thu te pen deihna leh hamphat nopna te hang bekbek hi
No comments:
Post a Comment